دل دہلا دینے والا واقعہ، پالتو کتے کئی دن تک مالک کی لاش کھاتے رہے
62 سالہ شخص، اٹاپول چارون پیتھک، اپنے گھر میں ذیابیطس اور ہائی بلڈ پریشر کی وجہ سے موت کے منہ میں چلا گیا
دل دہلا دینے والا واقعہ، پالتو کتے کئی دن تک مالک کی لاش کھاتے رہے
بنکاک: بنکاک کے ایک گھر میں مالک کی موت کے بعد وہاں موجود پالتو کتوں نے بقا کے لیے اس کی لاش کھا لی، جو بعد میں پولیس نے دریافت کی۔
بنکاک میں ایک 62 سالہ شخص، اٹاپول چارون پیتھک، اپنے گھر میں ذیابیطس اور ہائی بلڈ پریشر کی وجہ سے موت کے منہ میں چلا گیا۔ اس کے بعد گھر میں موجود تقریباً دو درجن پالتو کتے بغیر خوراک اور پانی کے پھنسے رہے۔ پولیس کے مطابق، کتے کم از کم ایک ہفتے تک بغیر خوراک کے گھر میں بند تھے۔
یہ واقعہ اُس وقت سامنے آیا جب اٹاپول کے پڑوسی نے کئی دنوں تک اس کی گاڑی نہ چلنے کی وجہ سے اس کی خیریت معلوم کرنے کی کوشش کی۔ جب گھنٹی بجانے کے باوجود کوئی جواب نہ ملا تو پڑوسی نے پولیس کو اطلاع دی۔
پولیس جب اٹاپول کے گھر پہنچی تو اندر کا منظر انتہائی دل دہلا دینے والا تھا۔ گھر میں کچرے اور کتوں کے اخراج کی بدبو پھیلی ہوئی تھی۔ پولیس نے کتوں کو ریسکیو کرنے کے لیے ایک این جی او سے رابطہ کیا۔
این جی او کے مطابق، انہوں نے 28 کتوں کو بچایا، جن میں سے دو خوراک کی کمی کے باعث مر چکے تھے۔ جب این جی او کے ارکان پہنچے تو انہوں نے متوفی کی لاش کے ارد گرد تقریباً 15 کتے موجود پائے۔ کتوں کی حالت خوراک کی کمی کی وجہ سے انتہائی کمزور ہو چکی تھی۔
این جی او نے لوگوں سے ان کتوں کے لیے عطیات کی اپیل کی ہے تاکہ ان کی خوراک اور علاج ممکن ہو سکے۔
یہ واقعہ نہ صرف دل دہلا دینے والا ہے بلکہ اس نے بنکاک میں پالتو جانوروں کی دیکھ بھال اور ان کی حفاظت کے حوالے سے سوالات بھی اٹھا دیے ہیں۔
