کرم:مسافر گاڑیوں پر حملہ، 38 افراد جاں بحق
گاڑیوں پر پہاڑوں سے اندھا دھند فائرنگ کی گئی،متعدد زخمی
کرم:مسافر گاڑیوں پر حملہ، 38 افراد جاں بحق
پشاور:خیبر پختونخوا کے ضلع کرم میں پاراچنار سے پشاور جانے والی مسافر گاڑیوں کو نامعلوم مسلح افراد نے اپنے درندگی کا نشانہ بنایا، جس کے نتیجے میں 38 افراد جاں بحق اور متعدد زخمی ہوگئے۔
پولیس کے مطابق یہ افسوسناک واقعہ لوئر کرم کے علاقے اوچت میں پیش آیا، جہاں مسافر گاڑیوں پر پہاڑوں سے اندھا دھند فائرنگ کی گئی۔ قافلے میں شامل گاڑیاں پاراچنار سے پشاور کی جانب سفر کر رہی تھیں۔
حملہ آوروں نے خودکار ہتھیاروں کا استعمال کرتے ہوئے گاڑیوں پر شدید فائرنگ کی، جس کے نتیجے میں ایک خاتون سمیت 38 افراد جاں بحق ہوگئے۔ متعدد زخمیوں کو قریبی اسپتال منتقل کیا گیا، جہاں کئی زخمیوں کی حالت تشویش ناک بتائی جا رہی ہے، جس سے ہلاکتوں میں اضافے کا خدشہ ظاہر کیا جا رہا ہے۔
واقعے کے بعد سکیورٹی فورسز نے فوری طور پر علاقے کو گھیرے میں لے کر ملزمان کی تلاش شروع کر دی ہے۔ علاقے کی ناکہ بندی کر کے تحقیقات کا آغاز کر دیا گیا ہے، جبکہ زخمیوں کو ہر ممکن طبی امداد فراہم کی جا رہی ہے۔
