امریکی فوجی خاتون لیفٹیننٹ مِس یو ایس اے

واشنگٹن: امریکی فوج کی خاتون لیفٹیننٹ ایلما کوپر مِس یو ایس اے 2024 بن گئیں۔غیرملکی میڈیا کے مطابق مِس یو ایس اے کا ٹائٹل متنازع ہونے کے بعد اب بالآخر 22 سالہ ایلما کوپر مِس یو ایس اے 2024 بن گئیں۔
غیرملکی میڈیا کے مطابق امریکی ریاست مشی گن سے تعلق رکھنے والی ایلما کوپر کو امریکی شہر لاس اینجلس میں اتوار کو ہونے والی تقریب میں نامزد کیا گیا۔ ایلما کوپر اب نومبر میں مِس یونیورس مقابلے میں حصہ لیں گی، ان کی سوشل میڈیا پر نظر ڈالی جائے تو پتہ چلتا ہے کہ وہ سیکنڈ لیفٹیننٹ ہیں اور ملٹری انٹیلی جنس افسر کے طور پر کام کرتی ہیں اور انہوں نے اسٹینفورڈ یونیورسٹی سے ڈیٹا سائنس میں ماسٹرز کیا ہے۔
سوال و جواب کے سیشن کے دوران ایلما کوپر نے بتایا تھا کہ ایک تارکین وطن کی بیٹی اور ایک قابل فخر خاتون اور امریکی فوج کی ایک افسر کے طور پر میں خواب میں جی رہی ہوں۔ان کا کہنا تھا کہ میری زندگی اور میری ماں نے مجھے سکھایا ہے کہ آپ کے حالات کبھی بھی آپ کی تقدیر کا تعین نہیں کرتے، آپ بہترین کا مطالبہ کر کے کامیابی حاصل کرسکتے ہیں۔
قبل ازیں مئی میں نویلیا ووئگٹ کے اچانک مِس یو ایس اے 2023 کے ٹائٹل سے دستبردار ہونے کے بعد مقابلے میں دوسرے نمبر پر آنے والی خاتون 28 سالہ سوانا گینکیوچز کو ٹائٹل دیا گیا تھا۔