ایک ہزار سال پرانے بیج سے درخت اُگا لیا گیا
یہ بیج 1980 کی دہائی کے آخر میں آثار قدیمہ کے ماہرین نے دریافت کیا تھا
ایک ہزار سال پرانے بیج سے درخت اُگا لیا گیا
مقبوضہ یروشلم کی قدیم سرزمین سے ایک ایسا حیرت انگیز راز ابھرا ہے جو زمانوں کی داستان سناتا ہے۔ سائنسدانوں نے ایک ہزار سال پرانے بیج کو دوبارہ زندگی بخشی اور اس سے ایک نایاب درخت اگایا۔ یہ حیرت انگیز تجربہ کسی قصے کی مانند ہے، جس میں ماضی اور حال کا سنگم ہمیں فطرت کی طاقت اور صدیوں پرانی تاریخ کے خزانوں سے روشناس کراتا ہے۔
سائنسدانوں کی ایک بین الاقوامی ٹیم نے آثار قدیمہ کی کھدائی کے دوران دریافت کیے گئے اس قدیم بیج کو، جس کا تعلق یہودیہ کے صحرا (مقبوضہ یروشلم) سے ہے، نئی زندگی دی۔ محققین کے مطابق یہ پودا کسی ناپید انواع کا حصہ ہو سکتا ہے، جس کی خصوصیات کا ذکر بائبل میں بھی ملتا ہے۔ یہ بیج 1980 کی دہائی کے آخر میں آثار قدیمہ کے ماہرین نے غاروں میں دریافت کیا تھا، لیکن اسے 2010 تک بویا نہیں گیا تھا۔ آج، یہ قدیم بیج ایک درخت کی شکل میں پروان چڑھ چکا ہے جو تقریباً 3 میٹر بلند ہے اور جس کا نام ملکہ سبا کی بادشاہت کے اعزاز میں رکھا گیا ہے۔
اس منصوبے پر کام کرنے والی ٹیم کی قیادت ہداسہ میڈیکل سینٹر، مقبوضہ یروشلم کی ڈاکٹر سارہ سیلون کر رہی ہیں، جن کے ساتھ امریکا، سوئٹزرلینڈ، فرانس اور آسٹریلیا کے محققین بھی شامل ہیں۔
یہ غیر معمولی کامیابی کمیونکیشنز بائیولوجی نامی معروف سائنسی جریدے میں شائع ہوئی ہے، جس میں ریڈیو کاربن ڈیٹنگ، ڈی این اے ترتیب، فائیلوجینیٹک اور فائٹو کیمیکل جیسے جدید طریقے استعمال کیے گئے۔ محققین نے ان نتائج کا موازنہ آثار قدیمہ کے فیٹو جیوگرافک ڈیٹا اور تاریخی حوالوں سے کیا ہے۔
یہ دریافت نہ صرف سائنسی کامیابی کا ایک بڑا سنگ میل ہے بلکہ ماضی کے پردوں میں چھپے رازوں کو بھی اجاگر کرتی ہے، جو تاریخ کے دریچوں کو دوبارہ کھولنے کے مترادف ہے۔
