دنیا کی سب سے بلند عمارت کی تعمیر کب مکمل ہو گی؟

دنیا کی سب سے بلند عمارت کی تعمیر کب مکمل ہو گی؟

ریاض: سعودی عرب کے آسمان میں ایک بار پھر ایک خواب کو حقیقت بنتے دیکھنے کا سفر شروع ہو چکا ہے۔ دنیا کی سب سے بلند عمارت، جدہ ٹاور، جو ایک کلو میٹر کی حیرت انگیز بلندی پر واقع ہوگی کی تعمیر کا کام دوبارہ آغاز ہو چکا ہے۔ اس فلک بوس عمارت کے مکمل ہونے کے بعد یہ دنیا کی سب سے اونچی عمارت کا لقب اپنے نام کرے گی۔

یہ عظیم منصوبہ جو سات سال قبل ملک بھر میں انسداد بدعنوانی کی مہم کے دوران روک دیا گیا تھا، ایک مرتبہ پھر ترقی کی راہوں پر گامزن ہے۔ حالیہ دنوں میں اس منصوبے کے ذمہ دار ادارے، جدہ اکنامک کمپنی (جے ای سی) نے سائٹ پر ایک شاندار تقریب میں اعلان کیا کہ یہ شاندار ٹاور 2028 تک مکمل ہونے کی امید ہے۔

جدہ ٹاور جو ایک ہزار میٹر (3,280 فٹ) بلند ہوگا، پہلے ہی تقریباً ایک تہائی تکمیل کو پہنچ چکا تھا جب 2017 میں اس کے مرکزی ٹھیکیدار سمیت کئی اہم شخصیات کو انسداد بدعنوانی مہم کے تحت گرفتار کیا گیا۔ اس مہم کے نتیجے میں سینکڑوں افراد کے خلاف تحقیقات کی گئیں اور اس دوران اس تاریخی منصوبے پر بھی کام روک دیا گیا۔

اس کے باوجود کچھ عرصے تک تعمیرات جاری رہیں، لیکن پھر ایک وقت ایسا آیا کہ یہ عظیم منصوبہ بالکل رک گیا۔ جدہ اکنامک کمپنی نے سی این این کو بتایا کہ تعمیر کا کام جلد دوبارہ شروع کرنے کا ارادہ تھا، لیکن کورونا وائرس کی وبا کے باعث ایک سال کا غیر متوقع وقفہ آ گیا، جس نے اس شاندار منصوبے کو مزید تاخیر کا شکار کر دیا۔

اب جبکہ رکاوٹیں دور ہو چکی ہیں، یہ منصوبہ ایک مرتبہ پھر خوابوں کو حقیقت میں بدلنے کی راہ پر ہے۔