کملا ہیرس کی حمایت کرنے پر ٹرمپ نے ٹیلر سوئفٹ کا بھی مذاق اڑا دیا

واشنگٹن :ڈونلڈ ٹرمپ نے ٹیلر سوئفٹ سے خواہش ظاہر کی کہ وہ ان کی حمایت کا اعلان کریں لیکن ٹیلر سوئفٹ نے صدارت جیتنے کے لیے کملا ہیرس کی حمایت کا اعلان کردیا جس سے لگتا ہے کہ سابق صدر کو شدید صدمہ پہنچا ہے۔غیرملکی خبررساں ادارے کے مطابق کملا ہیریس کے لیے ٹیلر سوئفٹ کی توثیق کے جواب میں سابق صدر ٹرمپ نے اتوار کے روز پاپ سٹار ٹیلر سوئفٹ پر شدید تنقید کرڈالی اور ان کا مذاق اڑایا ہے۔ ٹرمپ نے اپنی ویب سائٹ ٹروتھ سوشل پر بڑے حروف میں لکھا ہے میں ٹیلر سوئفٹ سے نفرت کرتا ہوں!ٹیلر سوئفٹ نے ٹرمپ اور ہیرس کے درمیان اے بی سی نیوز پر ہونے والی فیصلہ کن مباحثہ کے بعد کملا ہیریس کے لیے اپنی حمایت کا اعلان کیا تھا۔ یاد رہے ٹیلر سوئفٹ نے اس سے قبل 2020 کے الیکشن میں صدر بائیڈن کی حمایت کی تھی اور وہ صدارت جیت گئے تھے۔ مشہور امریکی سٹار کو بڑی تعداد میں لوگ سنتے ہیں۔ ہیریس کے لیے سوئفٹ کی حمایت کا اعلان ان کے مداحوں کے لیے ٹرمپ کے خلاف ایک واضح کال تھی۔